Служба Собору Дивеевских святых

Ме́сяца ию́ня в 14-й день

Собо́р святы́х Диве́евских

НА МА́ЛЕЙ ВЕЧЕ́РНИ

На Го́споди, воззва́х: стихи́ры святы́х на 4, глас 5:

Не́бо звезда́ми, Влады́ко, украси́вый/ и святы́ми Твои́ми всю зе́млю просвети́вый,/ светоно́сный собо́р Диве́евских святы́х яви́л еси́,/ Тебе́ возлюби́вших и всем се́рдцем взыска́вших,/ Твое́й же Пречи́стей Ма́тери послужи́вших,/ и́же не престаю́т ми́лостивно хода́тайствовати о нас,/ светолу́чными сия́нии чудотворе́ний озаря́юще/ и многоразли́чных обстоя́ний избавля́юще./ И́хже про́сим: о святи́и, моли́теся о нас,// чту́щих любо́вию святу́ю па́мять ва́шу. Дважды

Мно́жество звезд, Вседержи́телю, сотвори́вый/ и тьму нощну́ю тем просвеща́ти повеле́вый,/ светоявле́нный лик святы́х земли́ Диве́евския/ в Ца́рство сла́вы несказа́нныя прия́л еси́/ и те́плых хода́таев нам дарова́л еси́./ Мы же, благода́рни су́ще, вопие́м:/ о уго́дницы Бо́жии!/ Моли́теся о нас приле́жно,/ е́же усе́рдно Бо́гу угожда́ти,/ ве́ру Правосла́вную соблюда́ти,/ от бед Оте́честву на́шему изба́витися// и всем, почита́ющим вас любо́вию, спасти́ся.

Глас 4:

Преподо́бне о́тче Серафи́ме,/ любо́вию к Бо́гу распала́яся,/ тле́нная вся оста́вил еси́/ и избра́нник возлю́блен Бо́жия Ма́тере яви́лся еси́,/ о оби́тели же Ея́ попече́ние оте́ческое име́я/ и неизрече́нных та́ин открове́ние прие́м,/ по благослове́нию и во́ли Ея́ вся устроя́л еси́./ О ста́рче ди́вный и богому́дрый,/ и́стинный наста́вниче на путь спасе́ния,/ учи́телю любве́ и целому́дрия!/ Диве́ево ди́вное тобо́ю ны́не сла́вится/ и свята́я ра́ка твоя́ оби́тель сию́ украша́ет,/ к не́йже я́ко к самому́ тебе́ припа́даем, прося́ще:/ не забу́ди нас, ра́досте на́ша,// Серафи́ме, преподо́бне о́тче наш.

Сла́ва, глас 2:

Днесь Це́рковь Ру́сская лику́ет/ и прославля́ет собо́р Диве́евских святы́х,/ во оби́тели до́брыми по́двиги/ во вся́цем чи́не и зва́нии подвиза́вшихся,/ зна́емых ку́пно и незна́емых,/ и́хже имена́ написа́шася в кни́зе жи́зни./ Тех предста́тельством и покро́вом Пречи́стыя Богоро́дицы/ Оте́чество и оби́тель на́шу в ми́ре сохрани́,// Многоми́лостиве Христе́ Бо́же наш.

И ны́не, Богоро́дичен, глас то́йже:

Все упова́ние мое́ на Тя возлага́ю,/ Ма́ти Бо́жия,// сохрани́ мя под кро́вом Твои́м.

На стихо́вне стихи́ры святы́х, глас 5.

Подо́бен: Преподо́бне о́тче:

Преподо́бная ма́ти на́ша Алекса́ндро!/ Явле́нием тебе́ Цари́цы Небе́сныя/ Диве́ево ди́вно освяти́ся/ и от Нея́ четве́ртым жре́бием нарече́ся./ Ты же, мно́гими труды́ и терпе́нием/ в сле́зном покая́нии основа́ние оби́тели положи́вши/ и благода́ть Свята́го Ду́ха стяжа́вши,/ ны́не в Небе́сных черто́зех лику́еши// и мо́лишися о спасе́нии душ на́ших.

Стих: Ди́вен Бог во святы́х Свои́х,/ Бог Изра́илев.

Преподо́бная ма́ти на́ша Ма́рфо!/ Ты, ангелоподо́бнаго ра́ди жития́ твоего́,/ возлю́бленная учени́ца преподо́бнаго Серафи́ма была́ еси́/ и открове́ние о гряду́щей сла́ве Диве́ева от него́ прия́ла еси́,/ моле́ние о е́же основа́ти оби́тель Ме́льничную с ним соверши́вши,/ на служе́ние в ней/ Цари́цею Небе́сною избра́на была́ еси́,// Ю́же моли́ о спасе́нии душ на́ших.

Стих: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них.

Преподо́бная ма́ти на́ша Еле́но!/ Ты отцу́ своему́ духо́вному преподо́бному Серафи́му/ в простоте́ се́рдца, я́ко Христу́, повинова́лася еси́/ и за послуша́ние в ю́ных ле́тех/ вме́сто бра́та смерть прия́ла еси́,/ па́че бо сея́ любве́ никто́же и́мать,/ да кто ду́шу свою́ положи́т за дру́ги своя́,/ глаго́лет Госпо́дь,// Его́же моли́ о спасе́нии душ на́ших.

Сла́ва, глас 6:

Благоче́стие свое́/ в прославле́нии твое́м, преподо́бне о́тче Серафи́ме,/ святы́й царь Никола́й явля́ет/ и, тя я́ко вели́каго уго́дника и чудотво́рца почита́я,/ со свято́ю цари́цею Алекса́ндрою/ пред мощьми́ твои́ми усе́рдно мо́лится:/ да Госпо́дь бла́гость Свою́ низпо́слет на Русь Святу́ю,// да́руя ей ве́лию ми́лость.

И ны́не, Богоро́дичен, глас то́йже: Творе́ц и Изба́витель:

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 1.

Подо́бен: О ди́вное чу́до:

О ди́вное чу́до!/ Всенепоро́чная Ма́ти Све́та,/ избра́вши в жре́бий Свой оби́тель Диве́евскую,/ блага́я обетова́ния о ней изрече́,/ благослове́ние Бо́жие и ми́лость Свою́ явля́ющи,/ да любо́вию Ей благода́рственно воспева́ем:/ Благода́тная, ра́дуйся,/ с Тобо́ю Госпо́дь,// подая́й ми́рови Тобо́ю ве́лию ми́лость.

Ди́вны Твоя́ та́йны, Богоро́дице,/ по сло́ву нело́жнаго обетова́ния/ оби́тель Твою́ при́сно посеща́еши,/ боже́ственными сия́нии А́нгельских во́инств обступа́ема/ и чи́ны всех святы́х земли́ Диве́евския прославля́ема,/ с ни́миже Тебе́ любо́вию воспева́ем:/ Благода́тная, ра́дуйся,/ с Тобо́ю Госпо́дь,// подая́й ми́рови Тобо́ю ве́лию ми́лость.

О ди́вное чу́до!/ Благослове́нная оби́тель Диве́евская/ четве́ртый уде́л Бо́жия Ма́тере нарица́ется,/ в не́йже сонм святы́х быва́ет/ и земли́ Ру́сской сла́ву ве́лию явля́ет./ Мы же, к ним припа́дающе, те́пле вопие́м:/ о уго́дницы всехва́льнии,/ Го́сподеви моли́теся// дарова́ти душа́м на́шим мир и ве́лию ми́лость.

Глас 2.

Подо́бен: Ки́ими похва́льными венцы́:

Ки́ими похва́льными добро́тами/ ублажи́м преподо́бнаго Серафи́ма?/ Повеле́ний Цари́цы Небе́сныя ве́рнаго исполни́теля,/ Диве́евския оби́тели устрои́теля и попечи́теля/ и сестр ея́ — отца́ чадолюби́ваго и духо́внаго окорми́теля,/ всем помо́щника ско́раго и в ско́рбех уте́шителя,// и моли́твенника те́плаго о душа́х на́ших.

Ки́ими вдохнове́нными пе́сньми/ воспое́м преподо́бныя жены́ Диве́евския?/ Алекса́ндру, Бо́жия Ма́тере избра́нницу/ и оби́тели на́шея первонача́льницу;/ Ма́рфу, отрокови́цу ангелоподо́бную,/ преподо́бнаго Серафи́ма сотаи́нницу;/ Еле́ну, кро́тость и смире́ние возлю́бльшую/ и в са́мой сме́рти и́стинное послуша́ние я́вльшую.// И́хже и́мамы моли́твенницы те́плыя о душа́х на́ших.

Ки́ими похва́льными словесы́/ возвели́чим Пелаги́ю, Параске́ву и Мари́ю блаже́нныя?/ Ко Го́споду вку́пе ду́хом горя́щия,/ стра́нницы земны́я, Оте́чества го́рняго взыску́ющия,/ прича́стницы зва́ния небе́снаго,/ ми́ру юро́дивыя, оба́че во Христе́ му́дрыя.// И́хже и́мамы моли́твенницы те́плыя о душа́х на́ших.

Ки́ими досто́йными венцы́/ увенча́ем священному́ченики добропобе́дныя?/ Серафи́ма, летопи́сца оби́тели Диве́евския/ и гра́да свята́го Петра́ архипа́стыря многострада́льнаго,/ Иа́кова и Михаи́ла, иере́и благогове́йныя/ и сестр Диве́евских попечи́тели духо́вныя,/ новозакла́нныя а́гнцы, за Христа́ пострада́вшия.// И́хже и́мамы моли́твенники те́плыя о душа́х на́ших.

Ки́я неизрече́нныя да́ры/ принесе́м по достоя́нию/ новому́ченицам и испове́дницам Диве́евским?/ Ма́рфе и Пелаги́и, и́нокиням честны́м и а́гницам Христо́вым,/ Матро́не преподо́бней, испове́днице тверде́йшей,/ му́ченицам Евдоки́и, Да́рии, Да́рии и Мари́и,/ пе́рвым христиа́ном во страда́нии подо́бницам,/ ве́рным учени́цам Госпо́дним.// И́хже и́мамы моли́твенницы те́плыя о душа́х на́ших.

Сла́ва, глас 4:

Днесь наста́ со́лнца светле́йший пра́здник/ собо́ра святы́х Диве́евских,/ и́же ве́рныя к весе́лию созыва́ет/ и луча́ми ра́дости всех просвеща́ет,/ ди́вными сия́я чудесы́:/ в них бо яви́ся сла́ва Христо́ва,/ сла́ва Це́ркве Ру́сския./ Те́мже ве́рнии вопие́м любо́вию:/ моли́теся за ны ко Го́споду,/ вси святи́и земли́ на́шея,// поми́ловатися душа́м на́шим.

И ны́не, Богоро́дичен, глас то́йже: И́же Тебе́ ра́ди богооте́ц проро́к Дави́д:

Вход. Проки́мен дне. И чте́ния три.

Проро́чества Иса́иина чте́ние (глава́ 43):

Та́ко глаго́лет Госпо́дь:/ вси язы́цы собра́шася вку́пе и соберу́тся кня́зи от них,/ кто возвести́т сия́ в них?/ Или́, я́же от нача́ла, кто слы́шана сотвори́т вам?/ Да приведу́т свиде́тели своя́ и оправдя́тся,/ и да услы́шат, и да реку́т и́стину./ Бу́дите Ми свиде́тели, и Аз Свиде́тель, глаго́лет Госпо́дь Бог,/ и О́трок, Его́же избра́х,/ да позна́ете и ве́руете Ми,/ и разуме́ете, я́ко Аз есмь;/ пре́жде Мене́ не бысть ин бог и по Мне не бу́дет./ Аз есмь Бог, и несть, ра́зве Мене́, спаса́яй./ Аз возвести́х и спасо́х,/ уничижи́х, и не бе в вас чу́ждий./ Вы Мне свиде́тели, и Аз Госпо́дь Бог./ И еще́ от нача́ла Аз есмь,/ и несть от рук Мои́х избавля́яй;/ сотворю́, и кто отврати́т то?/ Си́це глаго́лет Госпо́дь Бог,/ избавля́яй вас Святы́й Изра́илев.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И, вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (главы́ 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетят,/ и от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я́ на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́ков,/ я́ко дана́ есть от Го́спода держа́ва вам/ и си́ла от Вы́шняго.

На лити́и стихи́ра хра́ма, та́же святы́х, глас 1:

Блаже́нна еси́, чу́дная оби́теле Диве́евская,/ сла́вни вси преде́ли твои́,/ стопа́ми Пресвяты́я Богоро́дицы освяще́ннии/ и по́двиги святы́х просла́вленнии,/ и́хже всехва́льную па́мять соверша́юще,/ славосло́вим Христа́ Бо́га, ди́внаго во святы́х Свои́х,// Ему́же мо́лимся спасти́ся душа́м на́шим.

Сла́ва, глас то́йже:

Небе́сных благ струи́ нетле́нныя,/ цельба́м су́щия исто́чник приснотеку́щий,/ свяще́нныя ва́ша мо́щи, о святи́и Диве́евстии,/ сия́нием бо Свята́го Ду́ха осеня́емыя,/ благоуха́ют и душетле́нных страсте́й исцеля́ют// и напая́ют сердца́ ве́рных благода́тию Боже́ственною.

И ны́не, Богоро́дичен, глас то́йже:

Вся́кое дыха́ние и тварь/ похвале́ние Тебе́ прино́сит, Влады́чице:/ и и́нокини Диве́евския, за́поведь преподо́бнаго Серафи́ма храня́щия,/ пред ико́ною свята́го Умиле́ния Твоего́ пе́ние моле́бное возсыла́ют:// Пресвята́я Богоро́дице, спаси́ нас!

На стихо́вне стихи́ры, глас 2.

Подо́бен: Егда́ от Дре́ва:

Егда́, я́ко зве́зды, све́том доброде́телей сия́ющия,/ озари́ли есте́ блиста́нием чуде́с вся концы́ Ру́сския земли́,/ преподо́бныя ма́тери на́ша Алекса́ндро, Ма́рфо и Еле́но,/ Цари́це Небе́сней ве́рно послужи́вшия,/ тогда́ ме́сто по́двигов ва́ших показа́ли есте́ не́бо друго́е./ Ны́не же па́мять ва́ша согрева́ет ве́рных сердца́,/ усе́рдно моля́щих вас:/ помяни́те нас, святы́я ма́тери на́ша,// у Престо́ла Бо́жия во Ца́рствии Небе́снем.

Стих: Ди́вен Бог во святы́х Свои́х,/ Бог Изра́илев.

Егда́, я́ко зла́то, в пещи́ искуше́ний сия́ющия,/ святы́я блаже́нныя ма́тери на́ша Пелаги́е, Параске́во и Мари́е,/ ше́ствовали есте́ те́сным путе́м,/ отве́ргшася себе́ и крест на ра́мо взе́мша,/ тогда́ све́том боже́ственныя му́дрости просвеща́емыя,/ ве́лия по́двиги и по́стныя труды́ понесли́ есте́./ И кто испове́сть смире́ние, незло́бие, терпе́ние ва́ше?/ Помяни́те чад свои́х, зову́щих вам любо́вию:// ра́дуйтеся, на́ша те́плыя предста́тельницы и покрови́тельницы.

Стих: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них.

Прииди́те, ве́рнии, согла́сно восхва́лим/ Це́ркве Христо́вы непоколеби́мое утвержде́ние,/ Цари́цы Небе́сныя сла́вное ополче́ние:/ му́ченика свяще́нна и святи́теля всече́стна Серафи́ма,/ дво́ицу иере́ев Михаи́ла и Иа́кова,/ свяще́нную похвалу́ па́стырей и́стинных,/ же́ртвенник красе́н свое́ се́рдце сотвори́вших/ и свяще́нную ри́зу кровьми́ обагри́вших.// И́хже ра́ди страда́ний, Всеси́льне Спа́се, поми́луй нас.

Сла́ва, глас 8:

О, пресла́внаго чудесе́!/ Стопа́м после́дующе дре́вних му́ченик/ тве́рдым ве́ры испове́данием,/ гоне́ний и страда́ний кре́пким терпе́нием,/ преподобному́ченицы Пелаги́я, Ма́рфа/ и преподобноиспове́дница Матро́на,/ све́том кре́стных луче́й осиява́емыя,/ венце́м побе́ды благосла́вно увенча́шася.// И́хже ра́ди по́двигов, Всеси́льне Спа́се, поми́луй нас.

И ны́не, Богоро́дичен, глас то́йже:

Влады́чице, приими́ моли́твы раб Твои́х/ и изба́ви нас// от вся́кия ну́жды и печа́ли.

Тропа́рь, глас 5:

Днесь церко́вная расширя́ются не́дра,/ прие́млюще бога́тство Бо́жия благода́ти,/ и ра́дуется Пресвяты́я Богоро́дицы избра́нная оби́тель,/ па́мять соверша́ющи многоимени́таго ли́ка святы́х Диве́евских,/ в Небе́снем Ца́рствии торжеству́ющих// и моля́щихся о душа́х на́ших.

НА У́ТРЕНИ

По 1-м стихосло́вии седа́лен, глас 4:

Днесь, я́ко со́лнце незаходи́мое,/ возсия́ всечестна́я па́мять собо́ра святы́х, в земли́ Диве́евской просия́вших,/ равноа́нгельным житие́м и му́ченическою сме́ртию Бо́гу угоди́вших/ и дерзнове́ние ве́лие у Него́ стяжа́вших./ И́хже моли́твами, Бо́же, да́руй нам ве́лию ми́лость.

Сла́ва, и ны́не, Богоро́дичен:

В хра́ме Рождества́ Твоего́, Пресвята́я Богоро́дице,  иде́же мо́щи святы́х почива́ют,/ немо́лчное славосло́вие Го́споду возно́сится/ и сим непреста́нным псалмопе́нием оби́тель Диве́евская укрепля́ется.

По 2-м стихосло́вии седа́лен, глас 6:

Днесь све́тло красу́ется оби́тель Диве́евская/ и ча́да Це́ркве Христо́вы ра́дуются,/ прославля́юще собо́р святы́х, в земли́ сей просия́вших,/ и ре́вностию ко спасе́нию просвеща́ются, взыва́юще:/ тех моли́твами, Го́споди, спаси́ ду́ши на́ша.

Сла́ва, и ны́не, Богоро́дичен:

Егда́ в день пра́зднования Пресвята́го Рождества́ Твоего́, Влады́чице,/ оби́тель Диве́евская ве́стию ско́рбною огласи́ся о гряду́щем разоре́нии ея́,/ тогда́ под Свой омофо́р и́нокинь честны́х взяла́ еси́, Пречи́стая,/ ско́рая в беда́х Помо́щнице.

Велича́ние:

Велича́ем вас,/ вси святи́и земли́ Диве́евския,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Псало́м избра́нный:

Го́споди Госпо́дь наш,/ я́ко чу́дно И́мя Твое́ по всей земли́.

Мне же зело́ че́стни бы́ша/ дру́зи Твои́, Бо́же.

Изочту́ их,/ и па́че песка́ умно́жатся.

Ди́вен Бог во святы́х Свои́х,/ Бог Изра́илев.

Святы́м, и́же суть на земли́ Его́,/ удиви́ Госпо́дь вся хоте́ния Своя́ в них.

Блаже́ни вси боя́щиися Го́спода,/ ходя́щии в путе́х Его́.

Восхва́лятся преподо́бнии во сла́ве,/ и возра́дуются на ло́жах свои́х.

Воспо́йте Го́сподеви песнь но́ву:/ хвале́ние Его́ в Це́ркви преподо́бных.

Собери́те Ему́ преподо́бныя Его́,/ завеща́ющия заве́т Его́ о же́ртвах.

Весели́теся о Го́споде/ и ра́дуйтеся, пра́веднии.

Пра́ведницы насле́дят зе́млю/ и вселя́тся в век ве́ка на ней.

Мно́ги ско́рби пра́ведным,/ и от всех их изба́вит я́ Госпо́дь.

Ми́лость же Госпо́дня от ве́ка и до ве́ка/ на боя́щихся Его́.

И пра́вда Его́ на сыне́х сыно́в, храня́щих заве́т Его́,/ и по́мнящих за́поведи Его́ твори́ти я́.

От восто́к со́лнца до за́пад/ хва́льно И́мя Госпо́дне.

По полиеле́и седа́лен, глас 4:

О сро́дницы на́ши и те́плии засту́пницы,/ и́же в земли́ Диве́евской просла́вльшиися:/ священному́ченицы, преподо́бнии, му́ченицы, испове́дницы и блаже́ннии,/ по́двиги свои́ми Бо́гу угоди́вшии/ и нетле́нныя сла́вы венцы́ украси́вшиися,/ Христа́ Бо́га на́шего моли́те/ мир Це́ркви дарова́ти/ и душа́м на́шим спасти́ся.

Сла́ва, и ны́не, Богоро́дичен:

Мно́гими содержи́ми напа́стьми,/ во вся́цей ско́рби душе́вней и обстоя́нии к Тебе́ прибега́ем, Пресвята́я Богоро́дице,/ моле́бное пе́ние по за́поведи преподо́бнаго Серафи́ма принося́ще:/ о Ма́ти Сло́ва и Де́во,/ от тя́жких и лю́тых нас спаси́!

 

Степе́нна, 1-й антифо́н 4-го гла́са. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Вся́кое дыха́ние: Ева́нгелие от Матфе́я, зача́ло 11.

 

По 50-м псалме́ стихи́ра, глас 6:

Це́ркве Христо́вы свети́льницы,/ всея́ Руси́ украше́ние,/ святи́и вси, в земли́ Диве́евской просия́вшии,/ Влады́ку всех моли́те/ мир вселе́нней дарова́ти/ и душа́м на́шим ве́лию ми́лость.

 

Кано́н святы́х, глас 1.

Песнь 1

Ирмо́с: Твоя́ победи́тельная десни́ца,/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,// изра́ильтяном путь глубины́ новосоде́лавшая.

Припе́в: Вси святи́и Диве́евстии, моли́те Бо́га о нас.

Днесь лику́ет оби́тель Диве́евская,/ четве́ртый уде́л Цари́цы Небе́сныя во вселе́нней имену́емая,/ прославля́ющи собо́р святы́х свои́х,/ я́ко зве́зды пресве́тлыя, не́бо церко́вное украси́вших.

Преподо́бне о́тче Серафи́ме!/ Ты, попече́ние о оби́тели Диве́евской/ из уст преподо́бныя Алекса́ндры, я́ко заве́т духо́вный, восприе́м,/ во вся дни живота́ твоего́ сию́ окормля́л еси́./ И ны́не, святы́ми моща́ми зде почива́я,/ обе́та своего́ не нару́шил еси́.

Священному́чениче святи́телю Серафи́ме!/ Ты, на ме́сто по́двигов Саро́вскаго Чудотво́рца прише́д,/ любо́вию к нему́ возгоре́лся еси́,/ и благослове́ние блаже́нныя Параске́вы улучи́в,/ многоце́нную ле́топись оби́тели Диве́евския соста́вил еси́.

Чудотво́рцу Саро́вскому тезоимени́те, святи́телю Серафи́ме!/ Ты, му́ченическия кончи́ны предрече́ние от него́ прие́м,/ утеше́ния в виде́нии от того́ сподо́бился еси́./ Ны́не же во Ца́рствии Небе́снем вку́пе с ним пребыва́еши/ и мо́лишися о душа́х на́ших.

Богоро́дичен: Ра́дуйся, Пресвята́я Госпоже́, Твои́м посеще́нием Диве́ево освяти́вшая,/ ра́дуйся, благоче́стие та́мо насади́вшая,/ ра́дуйся, мона́шествующих зде мно́жество собра́вшая.

Песнь 3

Ирмо́с: Еди́не ве́дый челове́ческаго существа́ не́мощь,/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,// одушевле́нный хра́ме неизрече́нныя сла́вы Твоея́, Человеколю́бче.

Повеле́ния Цари́цы Небе́сныя о жре́бии Ея́ сподо́бльшися,/ на по́двиг послуша́ния ре́вностне устреми́лася еси́,/ преподо́бная ма́ти Алекса́ндро,/ и нача́ло оби́тели Диве́евския положи́ла еси́.

Многотру́дныя по́двиги подъе́мши,/ доброде́тельми мно́гими украси́лася еси́, преподо́бная ма́ти Алекса́ндро,/ и, храм Каза́нския ико́ны Пресвяты́я Богоро́дицы во оби́тели устро́ивши,/ вели́кая свята́я жена́ яви́лася еси́.

О преподо́бная ма́ти Ма́рфо, вели́каго а́нгельскаго о́браза восприе́мнице!/ Ты во Ца́рствии Бо́жии со святы́ми де́вами предстои́ши,/ помяни́ и нас у Престо́ла Бо́жия.

Свобо́дну себе́ от обру́чника земна́го сотвори́вши,/ со све́тлою свеще́ю души́ твоея́ в сре́тение Небе́снаго Жениха́ устреми́лася еси́, преподо́бная Еле́но,/ Ему́же уневе́стившися,/ в черто́г Небе́сный с му́дрыми де́вами возшла́ еси́.

Богоро́дичен: Ра́дуйся, во уде́л Себе́ Диве́ево избра́вшая,/ ра́дуйся, Засту́пницею ме́ста сего́ бы́ти изво́лившая,/ ра́дуйся, ве́рным, пребыва́ющим во оби́тели, Спору́чнице ве́чнаго спасе́ния.

Седа́лен, глас 1:

Я́ко зве́зды многосве́тлыя,/ на не́бе церко́внем просия́вшии/ и по́двигов добропобе́дных сия́нием и чуде́с заря́ми/ всю зе́млю Диве́евскую просвети́вшии,/ вы, святи́и, Боже́ственныя све́тлости яви́лися есте́ прича́стницы/ и блаже́нныя жи́зни ве́чныя показа́лися есте́ насле́дницы./ Те́мже, всера́достную па́мять ва́шу соверша́юще, ве́рно вопие́м:/ моли́те Христа́ Бо́га грехо́в оставле́ние дарова́ти/ любо́вию вас почита́ющим.

Сла́ва, и ны́не, Богоро́дичен:

Благослове́ние на четве́ртый Твой уде́л,/ я́ко Иве́рии, Афо́ну и гра́ду Ки́еву, излия́ла еси́, Цари́це Небе́сная,/ и до днесь благода́ть Всесвята́го Ду́ха Бо́жия/ и оби́лие благ Небе́сных и земны́х/ от ме́ста Твоего́ возлю́бленнаго/ по сло́ву Твоему́ не оскудева́ют.

Песнь 4

Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му,// во спасе́ние на́ше и обновле́ние.

И́же лю́бит отца́ или́ ма́терь, сы́на или́ дщерь па́че Мене́,/ несть Мене́ досто́ин, рече́ Госпо́дь,/ и и́же не прии́мет креста́ своего́, несть Мене́ досто́ин./ Ты же, блаже́нная ма́ти Пелаги́е,/ вся дома́шняя своя́ оста́вльши, Го́споду твоему́ после́довала еси́/ и ду́шу свою́ в живо́т ве́чный соблюла́ еси́.

И́хже о́ко не ви́де, и у́хо не слы́ша, и на се́рдце челове́ку не взыдо́ша, угото́ва Бог лю́бящим Его́./ Ты же, блаже́нная ма́ти Параске́во,/ вся сия́ сокро́вища вы́шшия му́дрости духо́вныя/ безу́мием Христа́ ра́ди позна́ла еси́.

Се есть живо́т ве́чный, да позна́ем Го́спода,/ не разуме́ти бо Того́ смерть есть./ Ты же, блаже́нная ма́ти Мари́е,/ Бо́га я́ко Исто́чника жи́зни позна́вши и возлюби́вши,/ еще́ в жи́зни сей в се́рдце твое́м Ца́рствие Небе́сное обрела́ еси́.

Ди́вен Бог во святы́х Свои́х,/ И́же тле́нная в нетле́ние прелага́яй/ и ме́ртвенная в безсме́ртие облека́яй./ Той и ва́ша святы́я мо́щи, блаже́нныя ма́тери на́ша Пелаги́е, Параске́во и Мари́е,/ я́ко многоце́нное сокро́вище, в земли́ сокрове́нное, яви́ нам,/ во о́браз гряду́щаго всео́бщаго воскресе́ния.

Богоро́дичен: Ра́дуйся, те́плая Хода́таице о живу́щих в четве́ртом жре́бии Твое́м;/ ра́дуйся, ми́лость Сы́на Твоего́ до сконча́ния ве́ка ме́сту сему́ обеща́вшая;/ ра́дуйся, Ра́досте и Спасе́ние душ на́ших.

Песнь 5

Ирмо́с: Просвети́вый сия́нием/ прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ богоразу́мия,// правосла́вно пою́щих Тя.

Я́ко зла́то в горни́ле, Бог искуси́ тя/ и обре́те досто́йну Себе́, преподобному́ченице Ма́рфо честна́я,/ и, я́ко всепло́дие же́ртвенное, прия́т тя./ И́бо пред лице́м челове́ческим, а́ще и му́ку прия́ла еси́,/ упова́ние твое́ безсме́ртия испо́лнено,/ и вма́ле нака́зана бы́вши,/ вели́кими да́ры облагоде́тельствована еси́ на Небесе́х.

Те́лом умерщвле́на была́ еси́, преподобному́ченице Пелаги́е,/ муче́ние сме́ртное от рук богобо́рцев прие́мши,/ оба́че ду́хом низложи́ла еси́ де́монов немощны́я де́рзости/ и во страда́нии свое́м вене́ц нетле́нный прия́ла еси́/ от Христа́ Бо́га на́шего.

И́же а́ще испове́сть Сы́на Бо́жия пред челове́ки на земли́,/ того́ и Госпо́дь на Небеси́ испове́сть пред А́нгелы Свои́ми./ Ты же, преподо́бная Матро́но испове́днице,/ до́брым по́двигом ве́ры подвиза́вшися,/ испове́дание тве́рдое пред мучи́тели яви́ла еси́.

Преподобному́ченицы Ма́рфо, Пелаги́е/ и испове́днице сла́вная Матро́но,/ по́двиги ва́шими Це́рковь укра́сися,/ несть бо му́жеский пол, ни же́нский,/ но вся́ческая и во всех Христо́с Бог,/ бога́т Сый во всех призыва́ющих Его́.

Богоро́дичен: Ра́дуйся, Храни́тельнице на́ша в настоя́щем ве́це;/ ра́дуйся, Предста́тельнице и непосты́дное упова́ние в бу́дущем;/ ра́дуйся, вся́кое зло от жре́бия Своего́ отража́ющая.

Песнь 6

Ирмо́с: Обы́де нас после́дняя бе́здна,/ несть избавля́яй,/ вмени́хомся я́ко о́вцы заколе́ния./ Спаси́ лю́ди Твоя́, Бо́же наш:// Ты бо кре́пость немощству́ющих и исправле́ние.

Оби́тели Су́ждальския настоя́тельство прии́м,/ житие́ преподо́бнаго Евфи́мия соста́вил еси́, священному́чениче Серафи́ме./ Егда́ же Госпо́дь к святи́тельству тя призва́,/ Це́ркве Ру́сской послужи́л еси́/ и архипа́стырь добр яви́лся еси́.

Прехва́льне священному́чениче Михаи́ле,/ Архистрати́гу Небе́сных Сил тезоимени́те!/ Кто я́ко Бог – взыва́л еси́ пред богобо́рцы,/ Арха́нгела подража́в дерзнове́нию.

О́трасле пречестна́я ко́рене благочести́ваго, священному́чениче Михаи́ле,/ свяще́нным стопа́м отца́ твоего́ после́довав,/ ве́рности Бо́гу и благоче́стию того́ поревнова́л еси́/ и тождестрада́льник единокро́внаго бра́та твоего́ яви́лся еси́,/ с ни́мже моли́ся о спасе́нии душ на́ших.

Любо́вию к чи́ну мона́шескому преиспо́лненный,/ дом свой оби́тель для сестр, в изгна́нии су́щих, сотвори́л еси́, священному́чениче Иа́кове,/ Авраа́мле страннолю́бие показу́я/ и Иа́ковле многоча́дие духо́вне прие́мля,/ сего́ ра́ди мзда сих пра́отец на Небесе́х тебе́ дарова́ся.

Богоро́дичен: Ра́дуйся, Благода́тная, я́ко насле́дие Твое́ при́сно назира́еши;/ ра́дуйся, я́ко благода́ти и ми́лости Своея́ нас сподобля́еши;/ ра́дуйся, благослове́ние Сы́на Твоего́ на нас низводя́щая.

Конда́к, глас 8:

Сосу́ди Ду́ха Свята́го яви́стеся честны́м ва́шим житие́м,/ усе́рднии служи́телие Пресвяты́я Богоро́дицы,/ в земли́ Диве́евской просия́вшии,/ помяни́те нас у Престо́ла Бо́жия во Ца́рствии Небе́снем.

И́кос:

Аз есмь Лоза́, вы же ро́ждие,/ рече́ Христо́с Бог Свои́м ученико́м./ Та́кожде и вы, святи́и земли́ Диве́евския,/ яви́стеся в вертогра́де Небе́снем ро́ждие лозы́ Христо́вы,/ благоукраси́вше Святу́ю Це́рковь Ру́сскую плоды́ ве́ры и благоче́стия,/ помяни́те нас у Престо́ла Бо́жия во Ца́рствии Небе́снем.

Песнь 7

Ирмо́с: Авраа́мстии о́троцы в пещи́ Тро́ицу прообрази́вше,/ о́гненный пла́мень на ро́су преложи́ша/ и, пою́ще, вопия́ху:// благослове́н еси́, Бо́же оте́ц на́ших.

Тезоиме́нная благоволе́нию Бо́жию су́щи, му́ченице Евдоки́е блаже́нная,/ николи́же попече́ния по за́поведи Спаси́теля име́ла еси́,/ что я́сти, что пи́ти или́ во что облещи́ся,/ взыска́ла бо еси́ пре́жде Ца́рствия Бо́жия и пра́вды его́,/ и сего́ ра́ди вся потре́бная прия́ла еси́ от Го́спода Бо́га оте́ц на́ших.

Тезоиме́нно нарече́нныя, страстоте́рпицы Да́рие и и́на Да́рие Пу́зинския,/ во еди́нем во́зрасте му́ченическую смерть прия́ли есте́,/ не́мощны бо су́щия пло́тию,/ си́льны ду́хом Бо́гу яви́стеся, воспева́ющия:/ благослове́н еси́, Бо́же оте́ц на́ших.

Святи́теля Никола́я предста́тельством исцеле́ние от неду́га получи́вши, му́ченице Мари́е,/ блаже́нней Евдоки́и до конца́ жи́зни своея́ послужи́ла еси́, Го́сподеви воспева́ющи:/ благослове́н еси́, Бо́же оте́ц на́ших.

Тридне́вная избие́ния и смерть лю́тую претерпе́вша,/ сла́вныя му́ченицы Пу́зинския,/ стопа́м Христа́ после́довали есте́, взыва́юща:/ Тебе́ ра́ди, Женише́ наш, и́щущя страда́льчествуем,/ стра́ждем и умира́ем за Тя,/ да и живе́м с Тобо́ю, Бо́же оте́ц на́ших.

Богоро́дичен: Ра́дуйся, вся́ких даро́в рабо́м Твои́м Всеще́драя Пода́тельнице;/ ра́дуйся, во бра́нех, боле́знех и труде́х премилосе́рдая Уте́шительнице;/ ра́дуйся, Наде́ждо и Спасе́ние душ на́ших.

Песнь 8

Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,// по́йте и превозноси́те во вся ве́ки.

Нищелюби́ва, сиро́т и вдови́ц пита́тельница была́ еси́, ма́ти на́ша Алекса́ндро,/ ми́лостыню же ти та́йно творя́щей,/ возда́л есть тебе́ я́ве Оте́ц наш Небе́сный,/ Су́щий над все́ми Царь во вся ве́ки.

О ве́лия послуша́ния твоего́, ма́ти на́ша Ма́рфо!/ Ты и по сме́рти, я́ко и жива́ су́щи,/ моле́ния на́ша слы́шиши./ Те́мже и́стину, отцы́ рече́нную, я́ко сия́ доброде́тель не умира́ет,/ утвержда́еши во вся ве́ки.

О ма́ти на́ша Еле́но!/ Терпе́нию, смире́нию, кро́тости, чистоте́ и простоте́ голуби́ней/ преподо́бный Серафи́м тя научи́,/ си́ми же доброде́тельми к Ве́чней Жи́зни себе́ приугото́вивши,/ ны́не Бо́га воспева́еши во вся ве́ки.

Тро́ичен: Зна́менася благоволе́ние Святы́я Тро́ицы/ явле́нием трие́х голубе́й, над кресто́м хра́ма паря́щих в час освяще́ния его́./ Мы же, чу́до сие́ помина́юще, воспева́ем:/ Тро́ице Свята́я, сла́ва Тебе́.

Богоро́дичен: Пе́сни благода́рственныя прино́сим Ти, Ма́ти Бо́жия:/ ра́дуйся, я́ко спаса́еши нас при́сно от вся́каго обстоя́ния;/ ра́дуйся, я́ко пита́еши, устроя́еши и о нас промышля́еши;/ ра́дуйся, я́ко и по кончи́не на́шей Небе́снаго Ца́рствия сподобля́еши.

Песнь 9

Ирмо́с: О́браз чи́стаго Рождества́ Твоего́,/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти мо́лимся пещь,/ да Тя, Богоро́дице,// непреста́нно велича́ем.

Пресла́внии священному́ченицы Серафи́ме, Михаи́ле и Иа́кове!/ Вы честно́ю кро́вию свое́ю/ ри́зы свяще́нныя обагри́ли есте́/ и дре́вняго запина́теля му́жественне низложи́ли есте́.

Преподобному́ченицы Пелаги́е и Ма́рфо сла́вныя!/ Вы, на неви́димая воздая́ния взира́юща,/ сме́рти Христа́ ра́ди безбоя́зненно себе́ преда́ли есте́,/ ре́кша в се́рдце свое́м:/ ви́димая вре́менна суть,/ неви́димая же ве́чна.

Преподо́бная ма́ти на́ша Матро́но!/ Ты, по́стническим житие́м подвиза́вшися,/ испове́данием тве́рдым украси́лася еси́,/ и заточе́ния и го́рькия рабо́ты подъе́мши,/ мно́гия ско́рби и беды́ Христа́ ра́ди претерпе́ла еси́,/ сего́ ра́ди на Небесе́х мзду трудо́в твои́х обрела́ еси́.

Блаже́нныя ма́тери Пелаги́е, Параске́во и Мари́е!/ Вы, ко Го́споду ду́хом горя́ща,/ стра́нницы земны́я, Оте́чества Го́рняго взыску́ющия,/ во оби́тели Диве́евской яви́лися есте́/ преподо́бнаго Серафи́ма досто́йныя учени́цы бы́вша.

Богоро́дичен: О Де́во Пречи́стая,/ по глаго́лу Твоему́ оби́тель Диве́евская утверди́ся и просла́вися,/ и мно́жеством спаса́ющихся напо́лнися./ В ней же и сонм святы́х просия́,/ и́же мо́лятся о спасе́нии душ на́ших.

Свети́лен, глас 5:

Ра́дуйся, земле́ Диве́евская сла́вная,/ Небе́сныя засту́пники иму́щи вся святы́я, в тебе́ просия́вшия./ Днесь све́тло пра́здник тех соверша́юще,/ собо́р их досто́йно в пе́снех почита́ем.

Сла́ва, и ны́не, Богоро́дичен:

О Пречи́стая Де́во! Игу́мения оби́тели Диве́евския обеща́лася еси́ при́сно бы́ти/ и Го́споду зде служа́щих, я́ко зве́зды небе́сныя и песо́к морски́й, умно́жити./ Сего́ ра́ди Тя, Присноде́во, я́ко Ма́терь Све́та, и Сы́на Твоего́/ пе́сньми велича́ем.

На хвали́тех стихи́ры, глас 5.

Подо́бен: Ра́дуйся, Живоно́сный Кре́сте:

Ра́дуйся, оби́теле Диве́евская,/ из тебе́ бо произы́де ди́вный лик святы́х,/ в разли́чная ле́та мно́гия по́двиги поне́сших/ и собла́зны ми́ра невозвра́тно отве́ргших,/ Еди́ному же Го́споду послужи́вших/ и за́поведи Его́ свя́то соблю́дших./ К ни́мже с ве́рою и любо́вию возопии́м:/ ра́дуйтеся, оби́тели на́шея честны́й покро́ве и заступле́ние,// при́снии моли́твенницы о спасе́нии душ на́ших.

Ра́дуйся, оби́теле Диве́евская,/ собо́р святы́х в себе́ воспита́вшая,/ ти́и бо, нището́ю духо́вною обогати́вшеся,/ пла́чуще, благода́ти Уте́шителя испо́лнишася,/ кро́тцыи же су́ще, Ца́рствие Небе́сное насле́доваша,/ и а́лчуще и жа́ждуще пра́вды Бо́жия, насы́тишася,/ ми́лостию же укра́шенни, поми́ловани бы́ша/ и, я́ко чи́стии се́рдцем, Святу́ю Тро́ицу узре́ша./ К ни́мже с ве́рою и любо́вию возопии́м:/ ра́дуйтеся, оби́тели на́шея честны́й покро́ве и заступле́ние,// при́снии моли́твенницы о спасе́нии душ на́ших.

Ра́дуйся, оби́теле Диве́евская,/ ча́да бо твоя́, Живоно́снаго Креста́ благода́тию укрепля́ема,/ ве́рность и любо́вь ко Христу́ распя́тому сохрани́ша,/ страда́ния же многоразли́чная до́блественне претерпе́вше,/ я́ко во́ини необори́мии, венцы́ нетле́нныя восприя́ша,/ и пра́вды ра́ди изгна́на и му́чима,/ ве́чную сла́ву улучи́ша./ К ни́мже с ве́рою и любо́вию возопии́м:/ ра́дуйтеся, оби́тели на́шея честны́й покро́ве и заступле́ние,// при́снии моли́твенницы о спасе́нии душ на́ших.

Ра́дуйтеся, святи́и собо́ра Диве́евскаго,/ кра́сный плод по́двигов ва́ших Христу́ Бо́гу прине́сшии./ Ра́дуйтеся, я́ко, красото́ю любве́ сердца́ ва́ша украси́вше,/ долготерпе́нию и му́жеству ве́рных науча́ете./ Ра́дуйтеся, я́ко Престо́лу Вседержи́теля во сла́ве предстоя́ще,/ предста́тельством ва́шим при́сно о нас хода́тайствуете./ Ра́дуйтеся, оби́тели на́шея честны́й покро́ве и заступле́ние,// при́снии моли́твенницы о спасе́нии душ на́ших.

Сла́ва, глас 2:

Красу́йся ны́не, Диве́евская земле́,/ прине́сшая Бо́гу уго́дники святы́я:/ священному́ченики сла́вныя,/ па́стырем украше́ние,/ преподо́бныя отцы́ и ма́тери,/ А́нгелом сожи́тели,/ новому́ченицы и испове́дницы,/ му́чеников сла́ва и похвала́,/ блаже́нныя и юро́дивыя,/ цвет благоуха́нный незло́бивым./ И́хже моли́твами,// Христе́ Бо́же, поми́луй нас.

И ны́не, Богоро́дичен, глас то́йже:

Все упова́ние мое́ на Тя возлага́ю,/ Ма́ти Бо́жия,// сохрани́ мя под кро́вом Твои́м.

НА  ЛИТУРГИ́И

Блаже́нна от кано́на святы́х, пе́сни 3-я и 6-я на 8. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол ко Евре́ем, зача́ло 330. Коне́ц: Взира́юще на Нача́льника ве́ры, и Соверши́теля Иису́са. Аллилу́ия, глас 4: Воззва́ша пра́веднии, и Госпо́дь услы́ша их, и от всех скорбе́й их изба́ви их. Стих: Мно́ги ско́рби пра́ведным, и от всех их изба́вит я́ Госпо́дь. Ева́нгелие от Матфе́я, зача́ло 11. Прича́стен: Ра́дуйтеся, пра́веднии, о Го́споде, пра́вым подоба́ет похвала́.

Моли́тва

О всечестни́и святи́и Диве́евстии, избра́нницы Цари́цы Небе́сныя, при́снии Ея́ послу́шницы, по́двиги свои́ми в Ца́рствие Небе́сное возше́дшии!

Се ны́не в день о́бщаго ва́шего торжества́ прино́сим вам сие́ хвале́бное пе́ние, ублажа́ем свято́е житие́, прославля́ем вели́кая чудеса́, восхваля́ем любо́вь и велича́ем по́двиги ва́ша. Вы бо, пре́лести ми́ра сего́ отве́ргшеся и взе́мше крест свой, усе́рдно после́довали есте́ Христу́, та́же и, плоть свою́ распина́юще со страстьми́ и похотьми́, терпе́нием и му́жеством до конца́ врага́ низложи́ли есте́ и, прему́дрость ве́ка сего́ посрами́вше, ра́зум Христо́в стяжа́ли есте́.

Сего́ ра́ди мо́лим вас: о святи́и сро́дницы на́ши! Не оста́вите нас, чад ва́ших духо́вных, споспешеству́йте нам ве́ру Правосла́вную тве́рдо содержа́ти, да спаси́тельное се́мя не изсуше́но бу́дет зно́ем неве́рия, но плод оби́льный принесе́т, я́ко да и мы в бу́дущем ве́це вку́пе с ва́ми услы́шим блаже́нный глас Го́спода и Бо́га на́шего: прииди́те, благослове́ннии Отца́ Моего́, насле́дуйте угото́ванное вам Ца́рствие от сложе́ния ми́ра. Ами́нь.

 

 

 

Утверждена Священным Синодом

Русской Православной Церкви

09.03.2017 (журнал № 15).