Служба общая Христа ради юродивым, Пелагии, Параскеве и Марии Дивеевским. Составлена по Общей Минее.

На вели́цей вече́рни

На Го́споди, воззва́х: стихи́ры, глас 8

Подо́бен: О, пресла́внаго чудесе́:

Блаже́нная имяре́к: [Пелаги́е Параске́во Мари́е] богому́драя,/ чи́стая твоя́ душа́,/ правове́рным смы́слом сия́ющи,/ облиста́ющи доброде́телей светлостьми́,/ озаря́ет ве́рных исполне́ние,/ бесо́вскую тьму отгоня́ющи:/ те́мже я́ко прича́стницу тя/ Невече́рней благода́ти,// ублажа́ем благоче́стно вси, досточу́дная.

Име́ющи ду́шу ми́лостивну,/ и чист по́мысл, и се́рдце бо́дро,/ ве́ру  небла́зненну,/ и любо́вь вои́стинну нелицеме́рну,/ от земли́ преста́вилася еси́ к Небе́сным,/ и с ли́ки пра́ведных водворя́ешися:/ те́мже тя почита́ем свяще́нными пе́сньми,/ и благоче́стно вси сла́вим,// досточу́дная имяре́к: [Пелаги́е Параске́во Мари́е].

Боже́ственными уче́нии укрепля́ющися,/ стра́сти плотски́я от души́ отгна́ла еси́,/ и Святе́й Тро́ице селе́ние преочище́нное была́ еси́:/ тем к Боже́ственней жи́зни преста́вилася еси́,/ Бо́гу соблюда́ющу и ны́не/невреди́мо твое́ блаже́нное те́ло,/ Боже́ственным судо́м,/ и́мже Сам весть,// прославля́яй тя я́ве, имяре́к: [Пелаги́е Параске́во Мари́е].

Сла́ва, глас 1:

Ка́ко не диви́мся житию́ твоему́?/ Или́ не похва́лим, преподо́бная имяре́к: [Пелаги́е Параске́во Мари́е],/ житие́ твое́ равноа́нгельное?/ По́мысла целому́дренное, и кро́тости твоея́ смире́нное и молчали́вое,/ ми́лостыни неоску́дное?/ Все́ми доброде́тельми украси́лася еси́, блаже́нная:/ те́мже ожида́ет тебе́ неизглаго́ланная ра́дость,// и Небе́сное Ца́рствие.

И ны́не, Богоро́дичен, глас то́йже:

Всеми́рную сла́ву,/ от челове́к прозя́бшую/ и Влады́ку ро́ждшую,/ Небе́сную дверь воспои́м, Мари́ю Де́ву,/ Безпло́тных песнь и ве́рных удобре́ние:/ Сия́ бо яви́ся не́бо и храм Божества́,/ Сия́, прегражде́ние вражды́ разруши́вши,/ мир введе́ и Ца́рствие отве́рзе;/ Сию́ у́бо иму́ще ве́ры утвержде́ние,/ Побо́рника и́мамы, из Нея́ ро́ждшагося Го́спода/ Дерза́йте у́бо, дерза́йте, лю́дие Бо́жии,/ и́бо Той победи́т враги́,// я́ко Всеси́лен.

Вход Проки́мен дне И чте́ния три

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией/ и не прико́снется их му́ка/ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре/ Ибо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено/ И, вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́/ Яко зла́то в горни́ле, искуси́ их/ и, я́ко всепло́дие же́ртвенное, прия́т я́/ И во вре́мя посеще́ния их возсия́ют/ и, я́ко и́скры по сте́блию, потеку́т/ Су́дят язы́ком и облада́ют людьми́,/ и воцари́тся Госпо́дь в них во ве́ки/ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́// и посеще́ние во избра́нных Его́.

Прему́дрости Соломо́новы чте́ние

(главы́ 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго/ Сего́ ра́ди прии́мут Ца́рствие благоле́пия и вене́цдобро́ты от руки́ Госпо́дни,/ зане́ десни́цею покры́ет я́ и мы́шцею защити́т их/ Прии́мет всеору́жие рве́ние свое́/ и вооружи́т тварь в месть враго́м/ Облече́тся в броня́ пра́вды/ и  возложи́т шлем – суд нелицеме́рен/ Прии́мет щит непобеди́мый –  преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя/ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на намере́ние полетя́т,/ и от каменоме́тныя я́рости испо́лнь паду́т гра́ды/ Вознегоду́ет на них вода́ морска́я,/ ре́ки же потопя́т я́ на́гло/ Сопроти́в ста́нет им дух си́лы/ и, я́ко ви́хор, разве́ет их, и опустоши́т всю зе́млю беззако́ние,/ и злоде́йство преврати́т престо́лы си́льных/ Слы́шите у́бо, ца́рие, и разуме́йте,/ навы́кните, судии́ конце́в земли́/ Внуши́те, держа́щии мно́жества/ и гордя́щиися о наро́дех язы́ков,/ я́ко дана́ есть от Го́спода  держа́ва вам// и си́ла от Вы́шняго.

Прему́дрости Соломо́новы чте́ние

(глава́ 4):

Пра́ведник, а́ще пости́гнет сконча́тися, в поко́и бу́дет/ Ста́рость бо честна́ не многоле́тна,/ ниже́ в числе́ лет исчита́ется/ Седи́на же есть му́дрость  челове́ком,/ и во́зраст ста́рости житие́ нескве́рное/ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть/ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́/ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив/ Сконча́вся вма́ле, испо́лни ле́та до́лга/ Уго́дна бо бе́ Го́сподеви душа́ его́,/ сего́ ра́ди потща́ся от среды́ лука́вствия/ Лю́дие же ви́девше и не разуме́вше,/ ниже́ поло́жше в помышле́нии таково́е/ Яко благода́ть и ми́лость в преподо́бных Его́// и посеще́ние во избра́нных Его́.

На стихо́вне стихи́ры, глас 2

Подо́бен: До́ме Евфра́фов:

Дом и жили́ще/ Ду́ха Пресвята́го,/ прему́драя имяре́к: [Пелаги́е Параске́во Мари́е], была́ еси́:/ те́мже и нас до́мы Того́ соде́лай,// святу́ю твою́ па́мять почита́ющих.

Стих: Пра́ведницы во ве́ки живу́т,// и в Го́споде мзда их.

Житие́ твое́ я́ко со́лнце/ в сердца́ ве́рных возсия́,/ чудеса́ испуща́я:/ те́мже и нассве́том Невече́рним озари́,// всечестну́ю твою́ па́мять почита́ющих.

Стих: Наде́ющиися Нань разуме́ют и́стину,// и ве́рнии в любви́ пребу́дут Ему́.

Не преста́й моля́щися, имяре́к: [Пелаги́е Параске́во Мари́е],/ о при́сных твои́х рабе́х,/ и́хже духо́вным твои́м житие́м просвети́ла еси́,/ да вси честно́е твое́ пра́зднество,// веселя́щеся почита́ем.

Сла́ва, глас 4:

Земны́й а́нгел и Небе́сный челове́к/ яви́лася еси́, преблаже́нная,/ исто́чник умиле́ния, ми́лости тече́ние,/ пучи́на чуде́с, струя́ исцеле́ний,/ имяре́к: [Пелаги́е Параске́во Мари́е] досточу́дная,/ ма́слина Бо́жия вои́стинну плодови́та,/ еле́ем трудо́в твои́х/ просвеща́ющи ве́рно хва́лящих тя,/ и моля́щи Человеколю́бца, от бед изба́вити// любо́вию чту́щия всечестну́ю па́мять твою́.

И ны́не, Богоро́дичен, глас то́йже:

При́зри на моле́ния Твои́х раб, Всенепоро́чная,/ утоля́ющи лю́тая на ны́ воста́ния,/ вся́кия ско́рби нас изменя́ющи,/ Тя бо Еди́ну тве́рдое и изве́стное утвержде́ние и́мамы/и Твое́ предста́тельство стяжа́хом,/ да не постыди́мся, Влады́чице,/ Тя призыва́ющии,/ потщи́ся на умоле́ние Тебе́ ве́рно вопию́щих:/ ра́дуйся, Влады́чице, всех по́моще,// ра́досте и покро́ве, и спасе́ние душ на́ших.

Тропа́рь, глас 1:

Глас апо́стола Твоего́ Па́вла услы́шавши глаго́лющ:/ мы юро́ди Христа́ ра́ди,/ раба́ Твоя́, Христе́ Бо́же, имяре́к: [Пелаги́я Параске́ва Мари́я]/ юро́да бысть на земли́ Тебе́ ра́ди:/ те́мже па́мять ея́ почита́юще, Тебе́ мо́лим:// Го́споди, спаси́ ду́ши на́ша.

Сла́ва, и ны́не, Богоро́дичен, глас то́йже:

Гаврии́лу веща́вшу Тебе́, Де́во, ра́дуйся,/ со гла́сом воплоща́шеся всех Влады́ка/ в  Тебе́, святе́м киво́те,/ я́коже рече́ пра́ведный Дави́д,/ яви́лася еси́ ши́ршая Небе́с,/ поноси́вши Зижди́теля Твоего́:/ сла́ва Все́льшемуся в Тя;/ сла́ва Проше́дшему из Тебе́;// сла́ва Свободи́вшему нас рождество́м Твои́м.

На у́трени,

на Бог Госпо́дь: тропа́рь то́йже

По 1-й кафи́сме седа́лен, глас 5

Подо́бен: Собезнача́льное Сло́во:

Тве́рдаго адама́нта, и столпа́ непоколеби́ма вра́жиими прило́ги, богоно́сную имяре́к: [Пелаги́ю Параске́ву Мари́ю], пе́сньми почти́м: терпе́нием бо вои́стинну посрами́вшу сопроти́внаго врага́, и без ве́сти его́ сотвори́вшу, и ны́не моля́щуся о спасе́нии душ на́ших. Два́жды

Сла́ва, и ны́не, Богоро́дичен:

Ужа́сно чу́до зача́тия, и несказа́нен о́браз рождества́, в Тебе́ позна́ся, Чи́стая Присноде́во: ужаса́ет мой ум, и удивля́ет по́мысл Сла́ва Твоя́, Богоро́дице, всем простре́ся, во спасе́ние душ на́ших.

По 2-й кафи́сме седа́лен, глас 4

Подо́бен: Ско́ро предвари́:

Посто́м и воздержа́нием, и на земли́ лега́нием, увяди́ла еси́ плотски́я стра́сти: ду́шу же просвети́ла еси́, и на Небесе́х от Христа́ вели́кое возме́здие восприя́ла еси́ Тем благоугоди́ла еси́ Бо́гу, досто́ин сосу́д чуде́с и по кончи́не яви́лася еси́ притека́ющим к ра́це моще́й твои́х, имяре́к: [Пелаги́е Параске́во  Мари́е] преблаже́нная, моли́ Христа́ Бо́га, грехо́в оставле́ние дарова́ти чту́щим любо́вию святу́ю па́мять твою́. Два́жды

Сла́ва, и ны́не, Богоро́дичен:

Обнови́ла еси́, Чи́стая, Боже́ственным рождество́м Твои́м, истле́вшее страстьми́ земноро́дных ме́ртвенное существо́: и воздви́гла еси́ вся от сме́рти к жи́зни нетле́ния Те́мже Тя по до́лгу блажи́м вси, Де́во Препросла́вленная, я́коже прорекла́ еси́.

Велича́ние:

Ублажа́ем тя,/ свята́я блаже́нная ма́ти на́ша имяре́к: [Пелаги́е Параске́во Мари́е],/ и чтим святу́ю па́мять твою́:/ ты бо мо́лиши за нас// Христа́ Бо́га на́шего.

Псало́м избра́нный:

Терпя́, потерпе́х Го́спода, и внят ми, и услы́ша моли́тву мою́.

Се удали́хся бе́гая, и водвори́хся в пусты́ни.

Слеза́ми мои́ми посте́лю мою́ омочу́.

Храни́т Госпо́дь ду́ши преподо́бных Свои́х.

Восхва́лятся преподо́бнии во сла́ве, и возра́дуются на ло́жах свои́х.

Честна́ пред Го́сподем смерть преподо́бных Его́.

По полиеле́и седа́лен, глас 4

Подо́бен: Ско́ро предвари́:

Яви́лася еси́ чу́дна в терпе́нии твое́м, вся́чески Христу́ угоди́ла еси́, преблаже́нная имяре́к: [Пелаги́е Параске́во Мари́е], му́дрою мы́слию утверди́ла еси́ ду́шу твою́, порабо́тивши плотска́я мудрова́ния ду́ху, и избра́вши до́брая, е́же Бо́га ра́ди тружда́тися, му́жески глаго́лала еси́: а́ще и я́ра зима́, но сла́док рай; боле́зненно е́же тружда́тися, но блаже́нно восприя́тие Те́мже, преблаже́нная, моли́ Христа́ Бо́га, спасти́ ду́ши на́ша. Два́жды

Сла́ва, и ны́не, Богоро́дичен:

Тебе́ велича́ем, Богоро́дице, вопию́ще: Ты еди́на Благослове́нная, из Тебе́ бо неизрече́нно роди́ся Христо́с Бог наш.

Степе́нна, 1-й антифо́н 4-го гла́са

Проки́мен, глас 4: Ди́вен Бог во святы́х Свои́х,// Бог Изра́илев.

Стих: В це́рквах благослови́те Бо́га, Го́спода от исто́чник Изра́илевых.

Вся́кое дыха́ние:

Ева́нгелие от Матфе́я, зача́ло 104

По 50-м псалме́ стихи́ра, глас 8:

Челове́че Бо́жий, имяре́к: [Пелаги́е Параске́во Мари́е] чу́дная,/ ты у́бо возше́дши на ле́ствицу доброде́телей,/ по не́йже возшла́ еси́ к Го́рнему Иерусали́му/ и та́мо узре́ла еси́ жела́емаго Христа́/ Его́же ра́ди плоть твою́ изнури́ла еси́,/ и те́ло ме́ртвенное на безсме́ртную жизнь измени́ла еси/ И о нас непреста́нно моли́ся,/ дарова́ти душа́м на́шим// мир и ве́лию ми́лость.

Кано́н, глас 4

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний  пешеше́ствовав Изра́иль,/ крестообра́зныма Моисе́овыма рука́ма// Амали́кову си́лу в пусты́ни победи́л е́сть.

Припе́в: Свята́я блаже́нная ма́ти на́ша имяре́к: [Пелаги́е Параске́во Мари́е], моли́ Бо́га о нас.

Прича́стием е́же к Бо́гу, преподо́бная, свет была́ еси́, и к Нему́ отлучи́вшися, имяре́к: [Пелаги́е Параске́во Мари́е] блаже́нная, жела́нием кра́йним, благи́м наде́ждам свои́м, ма́ти, исполне́ние прия́ла еси́.

Жела́нием е́же к Бо́гу распала́ема, мир оста́вила еси́, спу́тника обре́тши Христа́, ма́ти имяре́к: [Пелаги́е Параске́во Мари́е] сла́вная: с Ни́мже стезю́ прошла́ еси́ спаси́тельную ра́дующися.

Обогати́тися ника́коже истоща́емыми возжеле́вши, бога́тство и сла́ву вре́менную, му́драя, и пи́щу мимотеку́щую, и мирско́е достоя́ние доблему́дренно отри́нула еси́.

Богоро́дичен: Кра́сную и избра́нную и всечестну́ю разуме́в Тя Сын Бо́жий, Пренепоро́чная, Сын Твой бысть: сы́ны сотвори́ благода́тию, Богоро́дице, чту́щия Тя.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,// и прибе́жище, и утвержде́ние.

Усе́рдно к мы́сленным совлекла́ся еси́ дея́нием, побежда́ющи вра́жия полки́, посо́бием Боже́ственнаго Ду́ха.

Ра́нами и моли́твенным воздержа́нием, и бие́нии, преподо́бная, стра́сти мирски́я, ма́ти имяре́к: [Пелаги́е Параске́во Мари́е], уязви́ла еси́.

Умори́ врага́ блаже́нная Твоя́, Иису́се, имяре́к: [Пелаги́я Параске́ва Мари́я], умерщвле́ния Твоего́, Влады́ко, живоно́снаго ра́достно возжеле́вши.

Богоро́дичен: Избавля́ющаго челове́ки преслуша́ния лю́таго паде́ния, всему́ вино́внаго, Чи́стая и Всенепоро́чная, родила́ еси́.

Седа́лен, глас 5

Подо́бен: Собезнача́льное:

Согла́сием Боже́ственным озаря́ема, в пути́ веду́щия к Боже́ственным сия́нием ходи́ла еси́ ве́рно, ма́ти преподо́бная, и враго́в отбе́гши прило́гов, дщерь све́та и дне яви́лася еси́, имяре́к: [Пелаги́е Параске́во Мари́е] богоблаже́нная.

Сла́ва, и ны́не, Богоро́дичен:

Ма́ти Бо́жия Пречи́стая, гра́де христиа́нский, изба́ви лю́ди Твоя́ от бед приле́жно зову́щия, и проти́вися враго́м го́рдым мы́сленным, да вопие́м Ти: ра́дуйся, Благослове́нная.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста́ в чи́не свое́м,/ досто́йно взыва́ющи:// сла́ва си́ле Твое́й, Го́споди.

Соедини́вшися стезе́ пра́вды, в богоспаса́емый Боже́ственный Град возшла́ еси́, преподо́бная имяре́к: [Пелаги́е Параске́во Мари́е], спаси́тельным сия́нием обогати́вшися.

Единообра́зный, преподо́бная имяре́к: [Пелаги́е Параске́во Мари́е], смысл богоно́сный ви́девши, Боже́ственными повестьми́, и Боже́ственною оде́ждею оде́ялася еси́.

Се́рдце твое́ скрижа́ль очище́ну, Свята́го Ду́ха благода́ть обре́тши, ма́ти имяре́к: [Пелаги́е Параске́во Мари́е], написа́ соверше́нно безстра́стие, ве́ру и любо́вь нелицеме́рную.

Богоро́дичен: Седя́й на Престо́ле превознесе́нне херуви́мстем, я́ко престо́л Тя име́я, Мари́е Богоневе́сто, на рука́х Твои́х почи́, препросла́вленный Бог наш.

Песнь 5

Ирмо́с: Ты, Го́споди мой,/ свет в мир прише́л еси́,/ Свет Святы́й, обраща́яй из мра́чна неве́дения// ве́рою воспева́ющия Тя.

Пресве́тлую зарю́, имяре́к: [Пелаги́е Параске́во Мари́е], прии́мши, я́ко со́лнце яви́лася еси́, и де́монскую тьму отгна́ла еси́, достосла́вная.

Твои́м жела́нием, Христе́, окрили́вшися всепреподо́бная имяре́к: [Пелаги́я Параске́ва Мари́я], жела́ние теле́сное, я́коже изгре́бие мирско́е оттрясе́.

Си́лою Боже́ственною ду́шу укрепи́вши, в мир всели́лася еси́, опустева́ющи стра́сти, ма́ти богому́драя имяре́к: [Пелаги́е Параске́во Мари́е].

Богоро́дичен: Рече́ние преста́ тле́нное, Де́ва бо нетле́нно роди́ Бо́га Сло́ва, па́че естества́ и сло́ва Де́ва пребыва́ет.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х// исте́кшею Кро́вию.

Ум твой весь к Бо́гу простира́ющи, непреста́нными поуче́нии, плотски́я любве́ не пощаде́ла еси́, благи́х тебе́ хода́тайству, имяре́к: [Пелаги́е Параске́во Мари́е], присвое́ние.

Ни скве́рны, ни вра́ски прия́ла еси́, блаже́нная, посреде́ тебе́ ми́ра живу́щей, ча́стыми же па́че мольба́ми твои́ми очища́еши от душе́вныя скве́рны, притека́ющия к тебе́.

Ты плотски́х мудрова́ний вы́шше име́ющи по́мысл, безстра́стия оде́ждею, имяре́к: [Пелаги́е Параске́во Мари́е], оде́ялася еси́.

Богоро́дичен: Усты́ и по́мыслы и се́рдцем, Пресвята́я Богоро́дице, Тя пропове́дуем: Тобо́ю Бо́гу примири́хомся, отринове́ннии преступле́нием пе́рвее пра́отца.

Конда́к, глас 8:

Вы́шния красоты́ жела́ющи,/ ни́жния сла́сти теле́сныя то́щно оста́вила еси́,/ нестяжа́нием су́етнаго ми́ра,/ Ангельское житие́ проходя́щи, сконча́вшися, имяре́к: [Пелаги́е Параске́во Мари́е] блаже́нная:// с ни́миже Христа́ Бо́га моли́ непреста́нно о всех нас.

Икос:

Ка́ко возмогу́ гре́шный аз, и скве́рный душе́ю вку́пе и те́лом, исписа́ти е́же во  пло́ти сый, равноа́нгельное житие́ твое́, и пресла́вная чудеса́? Аще у́бо мно́зи прему́дрии не дости́гнут испове́дати мно́гаго твоего́ терпе́ния и смире́ния, и те́плыя ко Христу́ любве́, но оба́че наде́яся на твое́  беззло́бие, о блаже́нная, си́це вопию́ ти: ра́дуйся, пресве́тлая звездо́, от восто́ка доброде́телей возсия́вшая и вселе́нную чудесы́ озари́вшая. Ра́дуйся, возненави́девшая роди́тельскую любо́вь, Христа́ же еди́наго, над все́ми су́щаго Бо́га, всем се́рдцем возлюби́вшая, и Тому́ невозвра́тным жела́нием после́довала еси́. Ра́дуйся, я́ко бу́йственное и юро́дственное по апо́столу жи́тельство избра́вшая. Ра́дуйся, премени́вшая тле́нная и нестоя́щая, наде́ждею бу́дущих благи́х. Ра́дуйся, я́же дре́внему Иову уподо́бившаяся терпе́нием. Ра́дуйся, страстоте́рпице Христо́ва непобеди́мая, но при́сно побежда́ющая диа́вола твои́м смире́нием. Ра́дуйся, я́же я́ко дре́вний он Ла́зарь ни́щий, ны́не почива́еши в ло́не Авраа́мли. Ра́дуйся, я́же по отше́ствии от ми́ра сего́, су́щим в беда́х и искуше́ниих гото́ва обрета́ешися предста́тельница и засту́пница Ра́дуйся, везде́ призыва́ющих тя бы́стро предваря́еши Ра́дуйся, богому́драя имяре́к: [Пелаги́е Параске́во Мари́е].

Песнь 7

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем опаля́еми, взыва́ху:// благослове́н еси́ в хра́ме сла́вы Твоея́, Го́споди.

Содержи́ма Христоподо́бною, ма́ти имяре́к: [Пелаги́е Параске́во Мари́е], Боже́ственною любо́вию други́х спасти́, ра́достно вся сама́ вопию́щи издала́ся еси́: благослове́н еси́ в хра́ме сла́вы Твоея́, Го́споди.

С Небесе́ тебе́ пода́нную, ма́ти имяре́к: [Пелаги́е Параске́во Мари́е], прие́мши пи́щу, се́ю препита́ла еси́ благопоко́рно прие́млющия твоя́ повеле́ния, и до́лу влеку́щий грех оставля́ющия, блаже́нная.

После́довавши оте́ческим преда́нием, ма́ти имяре́к: [Пелаги́е Параске́во Мари́е] му́драя, па́губы злочести́выя бе́гати запове́дала еси́ зову́щим: благослове́н еси́ в хра́ме сла́вы Твоея́, Го́споди.

Богоро́дичен: Вы́шняго освяще́нное Боже́ственное селе́ние, ра́дуйся: Тобо́ю бо даде́ся ра́дость, Богоро́дице, зову́щим: благослове́нна Ты в жена́х еси́, Всенепоро́чная Влады́чице.

Песнь 8

Ирмо́с: Ру́це распросте́р Дании́л,/ льво́в зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:// благослови́те, вся дела́ Госпо́дня, Го́спода.

Всесве́тлая ты была́ еси́ звезда́, су́щия в ти́не страсте́й приводя́щи к животу́: твори́ши бо жены́ нечи́стыя целому́дренно  жи́ти, и отго́ниши лю́тыя неду́ги, вопию́щи:благослови́те, вся дела́ Госпо́дня, Го́спода.

Су́щи цела́ умо́м в скро́ве му́дрых чуде́с, преподо́бная, мно́гия улови́ла еси́ юро́дствовати Го́спода ра́ди, ве́дущи наруга́ема бы́ти, вопию́щи чисте́йшею душе́ю, имяре́к: [Пелаги́е Параске́во Мари́е]: благослови́те, вся дела́ Госпо́дня, Го́спода.

Соверше́н еди́н Госпо́дь, Иже Свои́х сла́вяй по достоя́нию, износи́му тя и гро́бу посыла́ему, блаже́нная, а́нгельскими светлослове́ньми почита́ет зову́щую: благослови́те, вся дела́ Госпо́дня, Го́спода.

Богоро́дичен: Избавля́яй нас возсия́ из Тебе́ Госпо́дь, Де́во Чи́стая, Его́же моли́, Влады́чице, просвети́ти пою́щия Тя, и обстоя́ния нас изба́вити вопию́щих: благослови́те, вся дела́ Госпо́дня, Го́спода.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́// Тем веселя́щеся, Тя, Богоро́дице, велича́ем.

Всем се́рдцем, имяре́к: [Пелаги́е Параске́во Мари́е], Тро́ице усе́рдно предложи́вшися, и от Нея́ лучи́ благоде́тельно прие́мши, светови́дна была́ еси́, и со Ангелы лику́еши.

Жела́нием Боже́ственным приедини́вшися, и воздержа́нием просвеща́ема, бу́дущих благ в прича́стии уже́ бы́вши, имяре́к: [Пелаги́е Параске́во Мари́е] богоблаже́нная, и в наслажде́нии.

Твои́ми боле́зньми и по́ты прия́ла еси́ весе́лие, ника́коже конца́ иму́щее: в не́мже пита́ющися, имяре́к: [Пелаги́е Параске́во Мари́е] преблаже́нная, и нас непреста́нно помина́й.

Богоро́дичен: Спаси́ мя, ро́ждшая всех Изба́вителя и Благоде́теля, разори́ души́ моея́о́блаки, Све́та о́блаче Свята́я Влады́чице, и си́льна соде́лай на стра́сти борю́щия мя.

Свети́лен:

Удали́вшися бе́гающи мирски́х сожи́тельства, Христу́ над все́ми Бо́гу на́шему непоро́чным житие́м благоугоди́ла еси́: Его́же ны́не моли́ о нас, рабе́х твои́х, ве́рою пра́зднующих всечестну́ю па́мять твою́, богому́драя имяре́к: [Пелаги́е Параске́во Мари́е].

Богоро́дичен:

Му́дрость Ипоста́сную и Сло́во Пресу́щное, и врача́ всех поро́ждшая, Де́во, стру́пы и я́звы души́ моея́ исцели́ лю́тыя и многовре́менныя: и страстна́я утоли́ се́рдца моего́ помышле́ния.

На хвали́тех стихи́ры, глас 4

Подо́бен: Дал еси́ зна́мение:

Дал еси́ при́тчу/ терпе́ния и му́жества,/ преблаги́й Го́споди,/ пра́ведныя имяре́к: [Пелаги́и Параске́вы Мари́и], и многочуде́сныя,/ доброде́тельми и словесы́/ и де́лы сия́ющия,/ целому́дрием украша́емыя и кро́тостию/ Тем Твое́ неизрече́нное строе́ние сла́вим,/ Иису́се всеси́льне,// и Спа́се душ на́ших. Два́жды

Пра́ведна и незло́бива,/ и́стинна же и непоро́чна и ве́рна,/ уклоня́ющися от вся́кия зло́бныя ве́щи,/ показа́лася еси́, имяре́к: [Пелаги́е Параске́во Мари́е] блаже́нная,/ просвеще́нна доброде́тельми,/ и благоче́стием сия́ющи/ Тем тя ублажа́ем,/ и свято́е твое́ и честно́е днесь пра́зднуем успе́ние,// ра́дующеся, богому́драя.

Целому́дрием и благове́рием,/ я́ко багряни́цею многоце́нною оде́явшися, имяре́к: [Пелаги́е Параске́во Мари́е],/ пра́вдою же и кро́тостию,/ я́ко Боже́ственным венце́м увенча́лася еси́,/ со стра́ждущими Христа́ ра́ди,/ ца́рствовати возжеле́ла еси́/ И ны́не Царю́ Сил предстои́ши,/ Иису́су Всеми́лостивому,// и Спа́су душ на́ших.

Сла́ва, глас 8:

Доброде́телей твои́х, богому́драя имяре́к: [Пелаги́е Параске́во Мари́е],/ исправле́ния уясни́ша ве́рных сердца́:/ кто́ бо слы́ша безме́рное твое́ смире́ние и терпе́ние, не удиви́тся?/ Еже ко всем кро́тость и беззло́бие,/ к скорбя́щим ми́лование/ и су́щим в беда́х ско́рое поможе́ние,/ пла́вающим немяте́жное приста́нище/ и путеше́ствующим благо́е по-спеше́ние,/ вся боголе́пно предвари́, досточу́дная/ И ны́не неувяда́емым венце́м венча́лася еси́/ от руки́ Вседержи́теля Бо́га,// Его́же моли́ спасти́ся душа́м на́шим.

И ны́не, Богоро́дичен:

Влады́чице, приими́ моли́твы рабо́в Твои́х,/ и изба́ви нас// от вся́кия ну́жды и печа́ли.

На Литурги́и

Блаже́нны от кано́на святы́я, пе́сни 3-я и 6-я на 8. Проки́мен, глас 4: Ди́вен Бог во святы́х Свои́х,// Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол к Гала́том, зача́ло 208. Аллилу́ия, глас 1: Терпя́, потерпе́х Го́спода, и внят ми, и услы́ша моли́тву мою́. Ева́нгелие от Матфе́я, зача́ло 104. Прича́стен: В па́мять ве́чную бу́дет пра́ведник:

Моли́тва

О свята́я уго́днице Бо́жия, блаже́нная ма́ти на́ша имяре́к: [Пелаги́е Параске́во  Мари́е]! По́двигом до́брым подвиза́вшися на земли, восприя́ла еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́ Те́мже взира́юще на святы́й тво́й о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́ Ты же, предстоя́щи Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в нынешне́м ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Аминь.